- 比較少見以武打替身為主題嘅電影
- 演員除左有近排當紅嘅 “九龍城寨” 演員之外，仲有著名武術指導董瑋
- 董瑋響電影入面做返武術指導，伍允龍做武打明星，劉俊謙做替身，成個 setup 都好貼切而且有趣
- 感覺就係戲中戲，當中一幕講佢地拍街頭槍戰更加係假到差 d 變真
- 諗返自己細細個果陣 (80 年代) 成日都睇到呢 d 高難度動作同埋武打場面
- 由於當時香港盛產兼量產呢一類電影，睇得多就覺得：香港電影係咁架啦，有乜咁出奇？
- 近 5 – 10 年先知道：真係無野係永恒，而家唔好話武打電影，連香港電影都變得稀有
- 係今年出左套九龍城寨揚威世界各地之後，先有返 d 希望
- 武替道就係帶出好多呢個訊息：香港電影就快無架啦，全靠有心人同埋香港精神先可以支撐住
- 其實真係好 sad，近排新聞話有電影業工作者撐唔住所以輕生
- 電影當中另一個重點係可以睇到除左電影演員之外，監製、導演、副導演、武指、替身、燈光、美術等等嘅幕後工作人員係做乜，同埋佢地嘅重要性
- 我都參演過電影演出(只係一個大大大配角，但係見到我大頭差唔多一分鐘，導演真係唔話得)，所以知道電影製作同埋幕後人員有幾辛苦
- 導演一句 “Cut”，”嚟多次”，所有人再黎一次
- “Cut”，”嚟多次”，電影製作就係咁，不停重覆
- 記得當日我有份演戲果陣，其中一幕我要做嘅野係：跑，向前跑直至聽到嗌 “Cut”
- “Cut”，”嚟多次”，重覆左好幾次，第二日起身真係腳軟
- 鬼叫自己平時少運動咩
- 再加上而家自己有拍 youtube片、剪片，就更加體會到電影製作絕對唔簡單
- 觀眾見到一秒鐘嘅畫面，背後可以花費好多工夫、心機
- 武替道演員當中，董瑋演得特別扣人心弦
- 佢對電影嘅投入、要求，拍戲果陣嘅聲嘶力竭，非常 real，好多片段都令我以為入左去片場
- 劉俊謙感覺有提升，演得好自然
- 另外車婉婉出鏡時間雖少，但係含金量好高，果一幕非常難忘
- 觀後感除左係好睇同埋好有共鳴之外，亦都呼籲一下各位，有興趣想睇香港電影的話，唔好吝嗇一百幾十，入戲院睇戲
- 特別係頭幾日嘅票房係非常重要，因為戲院係會睇電影收唔收得而決定分配幾多場次比每一套電影
- 唔好等 Netflix、DisneyPlus 啦，除非你身處嘅地方嘅戲院真係無得睇
武替道
圖片來源：Google