- 好耐未試過咁心急去睇一套電影，多一日都唔想等
- 新聞話 “破地獄” 破左紀錄，上映第一日全香港 + 澳門有最多放映場次
- 今日響屋企附近嘅小小戲院睇都接近 full house，實在難以置信
- 有參加過中式喪禮的話，相信都有聽過甚至目睹過 “破地獄” 道教儀式，目的在於超渡亡者
- 電影最大嘅主題係死亡，然後再引申開去，包括殯儀行業、生命意義探討等等
- 氛圍實會沉重，可能因為咁，所以搵左兩位喜劇演員黄子華、許冠文做兩大主角，舒緩一下
- 人生有四個必經階段：生、老、病、死
- 前三者好多時都係閒話家常，偏偏響華人世界，死亡係一個帶住忌諱嘅話題
- 電影製作團隊打動左殯儀館同義莊，比佢地入去拍攝，而且東華義莊話呢套電影有意義，所以先特準佢地入去取景，只此一次
- 故事主角之一道生 (黄子華飾) 由婚禮策劃師轉行去做葬禮經紀人，另一位郭文 (文哥，許冠文飾) 係喃嘸師父，主持破地獄儀式
- 佢地成為左拍檔，一個負責接客，一個負責做葬禮儀式
- 故事就係講佢地相遇之後開始合作發生嘅事情
- 我出席過葬禮，當中有屬於我爸爸同阿嫲
- 所以電影入面好多畫面我都目睹過，當中最深刻係要我親手㩒掣送阿爸副棺木入去火化
- 當時我覺得好殘忍，點解要我咁做
- 而家過左差唔多廿年，同埋睇完電影之後，明白係想叫我同先人告別，釋懷放下
- 電影嘅故事情節、角色設定係好貼地、真實，原來係源自導演親身經歷
- 我記得有人問過：死嘅人痛苦定係身邊仍然活著嘅人痛苦？
- 呢個係電影嘅另一大課題：好多生存緊嘅人都各自有自己嘅地獄，佢地都要破地獄
- 郭志斌 (朱栢康飾) 同郭文玥 (衞詩雅飾) 都係文哥嘅仔女，佢地嘅生活都充滿難題
- 郭志斌跟老豆一樣做喃嘸，郭文玥做救護人員，即係話，全家人都經常接觸生與死
- 感覺好 sad 係咪？咁到底點算好？生人可以點樣破地獄？
- 電影最後有啟示嘅，雖然無話一定 work，但係相信可以令人釋懷
- 我自問都算睇得開，但係睇完呢套電影都有啟發，我覺得係呢套電影嘅魅力所在同埋意義
- 我覺得 “破地獄” 係有教育元素，已經唔再單單係好睇，係值得、需要睇
- 之前睇過幾套探討生死嘅日本電影如 “下一站天國”、”禮儀師之奏鳴曲” 等等，都係精彩
- 但係今次以香港為核心，感覺更加強烈、動人
- 電影入面嘅所有演員都好有水準，令到電影層次提升不少，帶我融入電影世界
- 我特別鐘意朱栢康同許冠文
- 電影最後段朱栢康嘅面容情緒搞到難喊嘅我都眼濕濕
- 自問感性、眼淺的話，做好準備啦
- 許冠文雖然係笑匠，但係睇佢之前演嘅 “一路順風”，已經睇到佢演其他劇種都掂，今次係差唔多無哂經典嘅許冠文搞笑味，收放自如
- 至於黄子華呢，今次我覺得佢進步不少，雖然仲有進步空間
- 散場後，響 YouTube 見到好多關於電影嘅演員、導演訪問
- 我覺得係同樣精彩，我差唔多睇哂，係電影嘅引伸閱讀，令我更深入了解電影帶出嘅訊息
- 感激電影製作團隊做左呢套咁精彩嘅作品
破·地獄
圖片來源：Google